جديد: إخضاع المرسمين لنفس صندوق التقاعد الخاص بالمتعاقدين

مرحبا، تحية طيبة للجميع،

بغيت نهضر على مهزلة بكل معاني الكلمة وقعت اليوم، وعرَّت على واقع الإجازة في التربية -أكاديمياً-

عبد ربه خريج الإجازة في التربية تخصص الفلسفة، وكيف كل الطلبة تسجلنا فلي ماستر لي فاتحين فتخصص الفلسفة، ولحسن حظنا وعن تميز تم قبول 11 طالب من قسمي بماستر الفلسفة والتربية بمكناس، وبكل صدق فرحنا لأننا قلنا وأخيراً هاد الماستر قبل علينا، وغايقبل إجازتنا، عيطو لينا للمقابلة الشفهية ومشينا ليها اليوم، وما إن دخلت للقاعة باس نجتاز المقابلة قالولي عطينا الملف (الملف أي كانوا طالبين هو الإجازة فالفلسفة وبيان النقاط ديال لي سومستر) عطيتو ليهم، وفاش شافوا نوع الإجازة قالولي فاش تسجلتي فالموقع شمن إجازة درتي قلت لهم الفلسفة، قالولي ولكن نتا معندكش الإجازة فالفلسفة عندك الإجازة في التربية، حاولت نشرح ليه الوضعية وبلي هما أثناء التسجيل مداروش شنو هاد الإجازة لي طالبين واش الأساسية ولا المهنية، دايرين غير الفلسفة، وذلك لي جعلنا ندفعوا لهاد الماستر، قالولي بلي الحاسوب هو لي تيديرو عملية الانتقاء بشكل تلقائي فاش تيكون نقطك مزيانة ونتا درتي الإجازة فالفلسفة فالتسجيل ولكن هنا تنلقاو عندك الإجازة فالتربية، عييت منشرح ليهم قالولي بلي هذا "احتيال" ونتوما باغيين تحتلوا علينا وتقولبونا، معحبنيش الحال ديال بصح حيت احتقرنا واحتقر إجازتنا... وهادشي ماتقالش غير ليا، تقال لجميع طلبة الاجازة في التربية، حنا ل11 وبعض الطلبة آخرين من مدرسة أخرى.. ضف إلى ذلك، ديجا حطينا الملف فالسيت قبل الانتقاء ورغم ذلك قبلونا، علاش ميقصيوناش فلول ومينتقيوناش، كاع باش بلا ميعذبونا! بعد ذلك عطاني الضوسي ديالي وقالي سير بحالك !

بكل صراحة مبقاش فيا أن هاد الماستر مشا من يدنا بعد ما الفرحة لي فرحناها من بعد الانتقاء، ولكن لي بقا فيا هو العذاب لي دارو لينا، جينا من مدن بعاد حتى لمكناس كلنا شغف باش تجتاز المقابلة وتميز فيها، وفلخر يقولك نتا "محتال"، هاد الكلمة قصحاتنا وقصحاتني أنا خصوصا بزااف، وقتلت فينا كل الشغف لأي حاجة فهاد القرايا ومابقينا باغيين والو غير راحة البال..

نصيحة من هاد العبد الضعيف، إلى كان شي ماستر فنفس مؤسستكم لي تتقراو فيه هضرو معاهم بديرو معاكم شي حل وتلتحقوا ليهم وخا حتى بالتزوير ويردو إجازتكم إجازة مهنية وماشي في التربية، نصيحة أخرى وياه شي حد يولي يتزرف ويدير هاد السلك، لأنه غايضيع طاقته وسنوات من عمره بدون أي فائدة، هاد الهضرة قاصحة، ولكن صحيحة وليوم عشت تجربة واقعية وتبين فيها كلشي.

وحتى إلى وقع شي تغيير فهاد الماستر ديال مكناس، وقبلونا بحجة أننا ماشي مسؤولين على هادشي، بل الوزارة لي مسؤولة، فراه عمري انسا هاد الاحتقار لي تعرضنا ليه اليوم.

نقطة أخيرة، شخصيا مبقا عندي منخسر مستعد من غدا نخرج ناضل، وإلى بقيتو واخدين الأمر باستهتار غايضربنا تران كاملين.. والسلام عليكم.

ي.ش (من بريد الصفحة)